QUELQUE BANNE MASAAIL IMPORTANT

Si ene personne ki fine mort ena dette, alors so bannes responsables bizin paye dette la plus vite possible depuis ene tiers de sa sa mayyit la so propriété, zotte pas gagne droit dépense plus ki ene tiers sans consentement de bannes les autres héritiers.

Si mayyit la pas fine quitte narien, li pas pou obligatoire lor bannes responsables pou paye so dette, mais si ene personne faire li, li pou gagne beaucoup récompense.

Nous capave faire Isaale-thawaab (avoye récompense) pou bannes morts a travers bannes bonnes actions. Par exemple : faire tilaawat-ul-Quraan, donne bannes pauvres manger, faire la charité, faire istighfaar etc. Pas ena aukene date spécifique ki fine mentionné dans sharia’h pou faire sa banne bonnes actions la, et li pas nécessaire ki bizin faire tous ensemble. Donc n’import quand ene personne gagne l’occasion li capave faire zotte.

Quand ene personne pe faire la charité pou ene mort, li preferable ki li faire l’intention pou rembourse bannes namaaz  ki sa mayyit la fine manquer dans so l’existance.

Shari’ah pas fine mentionne aukene couleur précis concernant vêtements ki bannes membres de la famille de sa mayyit la bizin metter lor zotte.

Ene mayyit c’est ene être ki fine né vivant ensuite de sa li mort. Nous bizin donne li ene nom, faire so ghussal, enveloppe li dans kafn et faire so namaaz janaazah avant enterrer.

Si ene zenfant fine né mort, nous bizin donne li ene nom, faire so ghussal, enveloppe   li dans ene morceau la toile (sans kafn), ensuite enterrer. (Pas ena namaz janaazah pou li).

Dans cas ene fausse couche (miscarriage) aussi même règlement pou appliquer a condition ki membre le corps de sa bébé la fine deja formé. C’est-à-dire nous bizin donne li ene nom, faire so ghussal, enveloppe li dans ene morceau la toile (sans kafn), ensuite enterrer. (Pas ena namaz janaazah pou li).

Dans ene fausse couche si bannes membres le corps pas fine formé, nous pas pou donne aukene nom, et pas pou ena ghussal. Alors nous pou enveloppe li dans ene morceau la toile ensuite enterrer, sans faire namaz janaazah.

Si ene parmi sa zenfant ki fine mort la so parents ene musulman, c'est-à-dire soit so maman musulman ou bien papa, alors sa zenfant la aussi pou être considéré comme ene musulman et tous bannes règlements ki fine mentionné la haut pou appliqué.

Pou ene personne ki fine suicidé aussi pou ena namaaz janaazah. Mais li préférable ki ene l’autre personne faire so namaaz janaazah appart ene Imaam et ene personne ki ena réputation dans la communauté.

Namaaz janaazah pou faire pou tous musulmans, pou ene dimoune ki pieux et pou ene pécheur aussi.

Fine rapporté par Hazrat Abu Hurairah (R.A) ki Nabi (Sallallaahu alaihi wasallam) fine dire : Celui ki accompagne janaazah de ene musulman avec sincérité et avec l’intention pou gagne récompense et li participe dans namaaz janaazah aussi bien que l’enterrement, sa personne la pou retourne la caze avec ene récompense de deux Qeeraat. Ene Qeeraat so récompense li égale a ene montagne UHUD. Ene personne ki faire seulement Namaaz janaazah ensuite li retourne la caze pou gagne récompense de ene Qeeraat seulement.

Note : Banne madame bizin pas suivre janaazah ni visit qabarastaan.